तरुण कौशिक/ संपादक/ सर्वव्यापी /हमर भारत देस के अयोध्या म जन्मे भगवान राम के चारों कोती जय-जयकार होत हवै अऊ सबों के मुंह म “जय सिरी राम” सुने ल मिलत हवै जऊन हम सबों हिंदू मन बर अब्बड़ -अब्बड़ खुसी के गोठ बात आए अऊ हमर छत्तीसगढ म ममा -भांजा के रिस्ता नाता अब्बड़ सम्मान के रिस्ता – नाता आए अऊ ममा मन अपन भांजा के खुसी बर बड़ – बड़ कामबूता कर लेथे फेर हमर छत्तीसगढ़ के भाजपा सरकार ह अपन भांजा राम बर कुछु नई कर पावत हवै, जेकर कारन भांजा राम ह नाराज दिखत हवै,काबर के भगवान राम ह अपन ममा विष्णु देव साय ल मन से आसिरवाद नई देवत हे, जेकर कारन सरकार के अब्बड़ बदनामी होत हवै। हमर छत्तीसगढ राज्य ल भगवान राम के ममा गांव अऊ ओखर दाई कौशल्या के मायके के रुप म दुनिया बर जानत हे अऊ हमर बर हर नज़र से खुसी के बाद आए के हमर छत्तीसगढ राज्य ह मध्यप्रदेश ले अलग होए के बाद हमर छत्तीसगढ म छत्तीसगढ़ महतारी के पूजा होत हवै अऊ हमर भगवान राम के दाई कौशल्या के छत्तीसगढ़ ह मायके आए, जेखरे कारन छत्तीसगढ़ ल छत्तीसगढ़ महतारी ले पुकारे जाथे, हमर भारत देस घलो ल भारत दाई कहे जाथे अऊ देस म के पहिली राज्य हमर छत्तीसगढ़ राज्य आए जऊन छत्तीसगढ़ महतारी के नाव ले जाने जाथे। आईसन म मध्यप्रदेश के ममा शिवराज सिंह चौहान जऊन मध्यप्रदेश के पूर्व मुख्यमंतरी अऊ वरतमान केंद्रीय मंतरी आए,ममा शिवराज घलो ल अब्बड़ पीरा होत हवै के छत्तीसगढ़ ह भगवान राम के ममा गांव आए फेर शिवराज के तरह विष्णु देव साय अऊ ओखर सरकार ह राम के ममा के जिम्मेदारी ल नई निभावत हे, जेकर से छत्तीसगढ़िया मन ल अब्बड़ पीरा होत हवै अऊ छत्तीसगढ़िया मन के पीरा ल देख के भगवान राम घलोक ह विष्णु देव साय सरकार ले नाराज हवै,तभे तौ ओखर मंतरीमंडल के सदस्य मन ल सड़क हादसा ले गुजरे ल पड़त हे। एक बछर के विष्णु देव साय सरकार ह अपन भांजा मन ल खुस करे बर अपन बहिनी -दीदी मन ल हर महीना एक -एक हजार रुपिया देवत हे अऊ अपन बेरोजगार भांजा – भांजी मन बर नौकरी के बेवस्था करत हे फेर छत्तीसगढ़ के विकास के गोठ बात आथे तौ कोनों कामबूता नई होत पावत हवै,मजे के गोठ बात आए के भगवान राम ल आदर्श मनाईया भाजपा सरकार ह भगवान राम के ममा गांव छत्तीसगढ़ के गांव – गांव ,सहर -सहर के विकास बर कोनों योजना लागू नई कर पावत हे जेखर कारन विष्णु सरकार ल कोनों पहिचान नई मिल पावत हे अऊ सबले बड़ गोठ बात आए के विष्णु देव साय सरकार ह कांग्रेस के पूर्व सरकार भूपेश बघेल सरकार ले कमजोर सरकार बने दिखाई देवत हे ,जेकर अब तक के कार्यकाल म सरकार ल आम लोगन घलोक मन कोसे म पाछू नई हटत हे अऊ भाजपा सरकार ले बने कांग्रेस सरकार ल बतावत हे। छत्तीसगढ़िया मन कहत हवै के पहिली पईत आईसन मुख्यमंतरी बने हे जऊन ह अपन सरकार ल बचाए बर कोनों रणनीति नई बना पावत हे अऊ पूरा मंतरीमंडल, संसदीय सचिव, निगम, मंडल, आयोग, बोर्ड म नियुक्ति नई कर पावत हे, सरकार के मुखिया विष्णु देव साय के नाव भगवान विष्णु के नाव आए अऊ भगवान राम घलोक ह भगवान विष्णु के अवतार आए फेर आज हमर छत्तीसगढ के मुखिया अपन नाव के अनुरुप कामबूता नई कर पावत, मुख्यमंत्री विष्णु देव साय अऊ भाजपा सरकार के संगे संग भाजपा नेता मन दिन- रात ” जय-जय सिरी राम” के नाव लेथे अऊ छत्तीसगढ़ राज्य ल भगवान राम के तरह आदर्श राज्य बनाए के गोठ बात कहिथे,काबर के भगवान राम के छत्तीसगढ़ ह ममा गांव के रुप जाने जाथे फेर एक बछर के कार्यकाल म भाजपा सरकार ह भगवान राम ल खुस करें बर कोनों बड़ कामबूता नई कर सकिस। आज छत्तीसगढ़ आईसन राज्य बने हवै के छोटे -छोटे चीज म नियाय पाए बर छत्तीसगढ़ के सरकारी कर्मचारी मन ल छत्तीसगढ़ उच्च न्यायालय के सरन म जाए ल पड़त हवै,काबर के विष्णु सरकार के सरन म जाए ले सिर्फ आश्वासन मिलत हे अऊ कुछु नई मिल पावत हे,कुल मिल के सिरतोन ईही गोठबात आए के मुखिया विष्णु देव साय के राज म कोनो ल संतृष्टि नई मिल पावत हवै,तव फेर भगवान राम के ममा गांव छत्तीसगढ़ म लोगन ल संतृष्टि नई मिल पावत हवै तव फेर भगवान राम ल कईसे संतृष्टि मिल ही अऊ ओखर ममा गांव म राज्य के महतारी यानी छत्तीसगढ़ महतारी अऊ महतारी भासा छत्तीसगढ़ी के मान-सम्मान बढ़ाए बर कुछु नई होत हवै, तव निश्चित रूप ले भांजा राम अपन ममा विष्णु ले अब्बड़ नाराज चलत हे,आईसन म ममा विष्णु ल अपन भांजा ल खुस करें बर छत्तीसगढ़, छत्तीसगढ़िया अऊ छत्तीसगढ़ी भासा के विकास बर कामबूता करना चाही,देखत हन भगवान राम छत्तीसगढ़ के भांजा के रुप म पूजाईया भाजपा सरकार ह अपन ममा होए के मान ल भांजा राम के सामने कईसे रख पाही..!