तरुण कौशिक/संपादक /
भारतीय जनता पार्टी के सरकार ह गरीब मन के ग़रीबी ल दूर करें के गोठ बात करथे अऊ गरीब मन के नांव म तरह-तरह के योजना चालू करें हें जऊन ह अब्बड़ सुघ्घर कामबूता आए अऊ केंद्र के मोदी सरकार ह गरीब मन के खुद के भूईयां म घर बनाए बर प्रधानमंत्री आवास योजना घलोक चलवत हें जेमा घर बनाए बर 1 लाख 20 हजार रुपिया देवत हें। जऊन ह माई लोगन मन के बैंक खाता म आवत हे, ऐखर संगे संग हमर परदेस के मुखिया विष्णु देव साय ह महतारी योजना ल लागू करें हें,जेमा छत्तीसगढ़ के माई लोगन ल हर महीना एक-एक हजार रुपिया मिलत हें ,जेकर ले लोगन मन विष्णु देव साय ले अब्बड़ खुस नजर आवत हे। दूसर डहर गरीब लोगन मन सरकार ले नाराज दिखत हें, काबर के जब ले छत्तीसगढ़ म भाजपा सरकार बने हें तब ले सरकार ह गरीब मन के सालों से रहे बेजाकब्जा के घर ल तोड़त हे।
हमर बिलासपुर सहर ले लेके नवा रायपुर के नकटी गांव म 40-50 साल ले बेजाकब्जा म घर- दूवारी बनाके अपन जिंदगी जीयत आवत हे ओला सरकार ह तोड़े म लगे हें,जेकर ले लोगन मन सरकार ले अब्बड़ नाराज दिखत हें। बिलासपुर सहर ह केंद्रीय राज्य मंत्री तोखन साहू,उप मुख्यमंत्री अरुण साव के पैतृक जिला अऊ सहर आए फेर ईहा के लोगन के घर दूवारी ल सरकार के आदेस म नगर निगम ह तोड़ दिस अऊ एक कन बीमार लईका के सदमा म मौत होके। तभो हमर छत्तीसगढ़ के भाजपा सरकार के विधायक, मंत्री मन ल गरीब मन के कोनों सुनवाई नई कर सकिस अऊ अब बिलासपुर सहर के आसपास के 50-60 साल ले बेजाकब्जा म अपन खून पसीना के कमाई ले बनाए घर – दूवारी ल टूट जाही,कही के सोच म डूबे। आईसने हाल रायपुर के नकटी गांव के लोगन संग होत हवै, जेकर घर -दूवारी ल तोड़ के जनप्रतिनिधि मन बर सरकारी घर- दूवारी बनाए के सोचत हे,फेर रायपुर के सांसद बृजमोहन अग्रवाल के एक चिट्ठी ले ईहां के गरीब लोगन ल भरोसा हवै के अब सरकार ह ओमन के घर-दूवारी ल नई तोड़य…!भाजपा सरकार के बेजा कब्जा तोड़े अभियान ले सरकार के खूब बदनामी होत हवै,काबर के लोगन मन अपन बेजाकब्जा के घर- दूवारी म सुख दुख के कामकाज करें हवै अऊ वरतमान म लोगन मन 40-50 बछर ले ओ जगह म रहत हे तव घर -दूवार ल कच्चा ले पक्का बना लिए हें। एकर संगे संग सहर के लोगन मन अऊ गांव देहात म सालों ले बेजाकब्जा ले घर बनाके रहत हे ओमन ल सरकार ह खुद सबों तरह के सुविधा दिए हे अऊ लोगन मन टैक्स घलोक देवत हवै,तव निश्चित रूप ले सरकार ल बेजाकब्जा म सालों ले रहवाईया लोगन के घर-दूवार ल तोड़े के बजाय ओमन ल पट्टा देना सरकार के हित म हवै। ऐकर संग म सरकार ल ईहू धियान देना चाही के सरकारी भूईयां म बेजाकब्जा होत हवै तव ओ बेजाकब्जा ल तुरंत तोडय, न के सालों बाद म..! अब ए दिसा म विष्णु देव साय सरकार ल सोंचे ल पड़ ही के वो ह छत्तीसगढ़ के चारों कोती 40-50 बछर ले बेजाकब्जा म घर-दूवारी बनाके रहत हे ओकर घर-दूवारी ल न तोड़य अऊ ओमन ल पट्टा देवय,तभे सरकार के सम्मान बढ़ जाही,नई तव आईसन काम काज ले विष्णु देव साय के सरकार दोबारा नई बन पाही हें…!