बिलासपुर/ तरुण कौशिक/ संपादक सर्वव्यापी /
हमर देस के सियान यानि के प्रधानमंत्री नरेन्द्र मोदी ह मां महामाया , मां काली,दाई बिलासा बाई केवंटीन अऊ स्वयं भू महादेव के गांव भूईया म कालि आवत हे, नरेन्द्र मोदी के कार्यक्रम ल लेके हमर बिलासपुर जिला अऊ पूरा राज्य शासन ह अब्बड़ -अब्बड़ कामबूता करे हवै,जेखर से देस के सियान नरेंद्र मोदी के सरकारी कार्यक्रम ल अब्बड़ -अब्बड़ सुघ्घर बनाए के संग आईसन सुवागत, सत्कार करें के तईयारी जिला कलेक्टर अवनीश शरण के नेतृत्व म करें गे हे। जेखर ले खुस होके हमर देस के सियान ह नई केवल बिलासपुर संभाग ल बल्कि पूरा छत्तीसगढ़ राज्य ल बड़ उपहार देही आईसन छत्तीसगढ़िया मन ल लगत हवै। देस के मुखिया बर गर्व के गोठ बात रईही के ओ हा हमर बिलासपुर जिला म मां महामाया, मां काली ,दाई बिलासा केवंटीन के भूईया म आवत हे अऊ संजोग आए के जिहां देस के मुखिया नरेंद्र मोदी के कार्यक्रम मोहभट्टा गांव हे,ओहा घलोक ह जगत पिता शिव जी भूईया आए,जिहां पीपल पेड़ के जड़ ले स्वयं भू महादेव शिवलिंग के आकर म निकले हे अऊ ईहां विराजमान बाबा भोलेनाथ के अलग महिमा हे । ईही ल सबले बड़ संजोग के रुप म देखे जात हे। ऐखर संगे संग नरेंद्र मोदी ह करोड़ों रुपिया के विकास कार्य के शिलान्यास, लोकार्पण कर ही अऊ ईही कारण ए समारोह ल “विकास परब ” के नांव देहे गे हे। छत्तीसगढ़िया मन के डहर ले राज्य पाल रमेन डेका, मुख्यमंत्री विष्णु देव साय अऊ स्थानीय जनप्रतिनिधि मन ओखर सुवागत कर ही, अऊ भरोसा करत हे के पहिली पईत बिल्हा, मोहभट्टा शिव के घर म मोदी आवत हवै तौ जरुर छत्तीसगढ़िया मन ल अब्बड़ कुछ उपहार के रुप म देही..! अब कालि पता चल जाही के नवरात्रि के पहिली दिन मां महामाया,मां काली,बिलासा दाई के भूईया अऊ स्वयं भू महादेव के गांव म देस के सियान ह आवत हे तौ छत्तीसगढ़िया मन ल का दे दे जाही…!