तरुण कौशिक/संपादक सर्वव्यापी/
आज के समय मं, जब हमन अपन 79वां स्वतंत्रता दिवस मनावत हन, हर घर तिरंगा अभियान पूरे देश मा देशभक्ति के नवा लहर जगा देहे। तिरंगा झंडा, जऊन हमर एकता, बलिदान अऊ स्वाभिमान के चिन्ह हावे, ओला घर-घर मं फहराय बर ये अभियान अपन परेम अऊ गर्व के बात ला फेर से जिन्दा कर देहे।तिरंगा ह सिरिफ कपड़ा नइ होय, ये हमर देश के आत्मा हावे। लाल रंग हमर वीरता अऊ बलिदान के कथा कहिथे, सफेद रंग शांति अऊ सच्चाई के राह देखाथे, अऊ हरा रंग समृद्धि अऊ उम्मीद के संदेश देथे। बीच मं चमकथे अशोक चक्र – जऊन हमर गति, परिश्रम अऊ न्याय के प्रतीक हावे।ये अभियान हमर मन ला याद कराथे के आजादी पाय बर कतका बलिदान होईस। गांव के चबूतरा ले शहर के चौक तक, जब-जब तिरंगा लहराही, त ओ नजारा मा अपनपन अऊ गर्व के मिलाजुला भाव उमड़ परही।हर घर तिरंगा ह सिरिफ झंडा फहराय के काम नइ, ये हमर भीतर के देशभक्ति ल जागृत करे के अवसर हावे। ये ह बताथे के चाहे हमन कतको भिन्न क्यों ना होवव, एक झंडा तले हम सब भारतवासी एक हन।आव, ये स्वतंत्रता दिवस मं, अपन घर के छत ऊपर तिरंगा लहराय संग-संग अपन मन मं भी तिरंगा के सम्मान फहरावन। अपन संतान मन ल सिखावन के तिरंगा सिरिफ रंग नइ, बल्कि हमर इतिहास अऊ भविष्य के आस हावे।जय जोहार..! जय हिंद..!जय भारत..!जय-जय छत्तीसगढ़..!!