तरुण कौशिक/ संपादक सर्वव्यापी/
छत्तीसगढ़ राज्य बने के बाद ले भाजपा के पूर्व रमन सरकार के बेरा ले गरीब मन ल एक रुपिया किलो म चाऊर देहे के सुरुआत होए रहिस जेन ल भूपेश कांग्रेस सरकार ह घलोक चालू रखे रहिस अऊ अब विष्णु देव साय सरकार घलोक ह एला चालू रखे हे। छत्तीसगढ़िया मन ल ए फोकट के मतलब एक अऊ दस रुपिया म चाऊर देके सरकारी कागज म गरीब बताए जावत हे ,जब के छत्तीसगढ़ म राशन दुकान मन म एक अऊ दस रुपिया के चाऊर ल ले हे बर छत्तीसगढ़िया मन पैदल नई बल्कि आज के डेढ़ लाख रुपिया म खरीदे मोटरसाइकिल अऊ दस – पंद्रह लाख के कार म जाथे। जेखर से पता चल जात हवै के हमर छत्तीसगढ़ के लोगन मन सिरतोन गरीब नई हे। एखर संगे संग किसान मन घलोक हर बछर लाखों रुपिया के धान ल बेचत हे अऊ सरकार ह किसान मन ल घलोक गरीब बता दें सरकार ह ओमन के कर्जा ल माफ करत आवत हे। छत्तीसगढ़ के पूर्व कांग्रेस सरकार देस के पहिली राज्य बनिस जऊन ह बेरोजगारी भत्ता देवत रहिस अऊ जवानों मन कोनों न कोनों कामबूता करके अपन परिवार अऊ खुद के खर्चा पानी बर दू पईसा कमावत हे, फेर राजनीतिक अऊ वोट के चक्कर म सरकार अऊ राजनीतिक दल मन छत्तीसगढ़िया मन ल केंद्र सरकार अऊ दूसर परदेस के सामने फोकट के योजना चालू करके दू पईसा ज्यादा कमाए के चक्कर म छत्तीसगढ़िया मन ल सरकारी कागज म गरीब बताए म पाछू नई हटत हे । जेखर कारण आज छत्तीसगढ़ ल देस अऊ दूसर परदेस के नजर म गरीब राज्य के रुप म पहिचाने जावत हे। आज छत्तीसगढ़िया मन अपन खून पसीना के कमाई ले खेती-बाड़ी, घर – दूवार, गाड़ी मोटर खरीदत हवै । जब के आज के महंगाई ल सबो जानत हे फेर आज छत्तीसगढ़ के कांग्रेस, भाजपा संगठन मन अपन राजनीतिक रोटी सेके बर छत्तीसगढ़ ल सबो डहर ले गरीब साबित करे म कोनों पाछू नई हटत हे। आज गरीब मन के गोठबात करिन तव सरकारी योजना ले माई लोगन मन कामबूता करके आत्मनिर्भर बनत हे अऊ लाखों रुपिया कमाई करके गाड़ी मोटर लेवत हे, घर परिवार म आमदनी बढ़त हे अऊ अपन जम्मो इच्छा ल लोगन मन पूरा करत हे। आज हमर छत्तीसगढ़िया मन गरीब होतिस तव फेर हर घर म दू- चार मोबाइल नई रहतिस अऊ हर महीने,दू – तीन महीना म सात- आठ सौ के रिचार्ज नई करा दिस, मोटर साइकिल,कार म हर दिन महंगाई के ए दिन म पेट्रोल – डिजल नई भरा के घुमतिस – फिरतिस! निश्चित रूप ले आज हमर छत्तीसगढ़ अऊ छत्तीसगढ़िया मन ह हर डहर से मजबूत हे। छत्तीसगढ़ म गरीब मन हवै फेर ओमन ल आजो ले सरकारी योजना के लाभ नई मिल पावत हे, जेन दिसा म सरकार अऊ अफसर मन कुछ नई कर पावत हे। सरकार अऊ अफसर मन रिश्वतखोर सरपंच, सचिव, पार्षद, अधिकारी मन के द्वारा सरकारी कागज ल देखके भरोसा कर लेथे ,जब के जमीनी हकीकत म आज भी गांव देहात,सहर के गली – मोहल्ला म आईसन गरीब हवै जऊन ल गरीब मन के हित म बने योजना के कुछु फायदा नई मिलत हे अऊ जेन ल मिलत हे ओमन सबो परकार से खुद म सक्षम हवै। चलव फेरे चुनाव आके हे फेरे गरीब मन के नाव म राजनीतिक पार्टी मन कई तरह के वादा कर ही अऊ सरकार बने के बाद गरीबी दूर करईया नेता,अफसर मन पांच साल म अरबपति बन जाही अऊ सरकारी कागज म छत्तीसगढ़ ह अऊ ज्यादा गरीब बन जाही..!